Գրականության և արվեստի թանգարանում դեկտեմբերի 6-ին, ժամը՝ 16:00-ին տեղի կունենա «Պարույր Սևակը երգերում» ժողովածուի շնորհանդեսը:

Գիրքը հրատարակվել է ՀՀ ԿԳՄՍՆ աջակցությամբ։ Կներկայացվեն նաև Պարույր Սևակի խոսքերով գրված երգերից։

 

Մուտքն ազատ է:

Պոլսահայ նշանավոր գրող Զահրատի ծննդյան 100-ամյակին նվիրված «Զահրատ-100, հատընտիր» գրքի շնորհանդեսը տեղի կունենա Գրականության և արվեստի թանգարանում նոյեմբերի 26-ին՝ ժամը 15:30:

Գիրքը տպագրվել է ԳԱԹ-ի և Պոլսի Հայոց Պատրիարքարանի հետ համագործակցությամբ: Հատընտիրի մեկենասն է դոկտոր Յակոբ Այնթապլեանը։

Շնորհանդեսին ներկա կգտնվի նաև Պոլսի Հայոց Պատրիարքարանի հրատարակչության տնօրեն Հովակիմ Վրդ. Սերովբեանը։

Կոմիտաս վարդապետի ծննդյան օրը, Կոմիտասի թանգարան-ինստիտուտում կբացվի «Փարիզյան հանդիպումներ» խորագրով ժամանակավոր ցուցադրությունը՝ նվիրված հայ դաշնակահարուհի, երգչուհի, երաժշտագետ, մանկավարժ, Վարդապետի մտերիմ բարեկամ Մարգարիտ Բաբայանի ծննդյան 150-ամյակին։

Գրականության և արվեստի թանգարանի ու Կոմիտասի թանգարան-ինստիտուտի համատեղ ցուցադրության շրջանակում կներկայացվի շուրջ 200 արխիվային փաստաթուղթ, լուսանկարներ, կտավներ՝ Գրականության և արվեստի թանգարանի, Հայաստանի ազգային պատկերասրահի և Կոմիտասի թանգարան-ինստիտուտի հավաքածուներից, ինչպես նաև Լալուա ընտանիքի անձնական արխիվից:

«Փարիզյան հանդիպումներ» ցուցադրությունը Մարգարիտ Բաբայանի, նրա ընտանիքի և XX դարի առաջին կեսի ֆրանսիական երաժշտական բոհեմի մասին է, երբ Ֆրանսիայի մայրաքաղաքը համաշխարհային մշակույթի կենտրոնն էր, և տարբեր երկրների արվեստագետներ, այդ թվում՝ հայերը, ձգտում էին դեպի Փարիզ։

Ցուցադրության տարբեր բաժիններ նվիրված կլինեն Մարգարիտ Բաբայանի երաժշտական և մանկավարժական գործունեությանը, մեկ առանձին բաժին էլ կներկայացնի Մարգարիտ Բաբայանի և Կոմիտասի մտերմության մասին՝ նրանց նամակագրության միջոցով։ Ցուցադրության տեսաձայնային հատվածում հնարավոր կլինի ունկնդրել երգչուհու ձայնը, դիտել տեսաֆիլմ, որտեղ իրենց հուշերով են կիսվում դաշնակահար, դիրիժոր Ալեքսանդր Սիրանոսյանը, ինչպես նաև Լուի Լալուայի և Շուշիկ Լալուա-Բաբայանի թոռը՝ Վենսան Լալուան։

Ցուցադրության համադրող՝ Մարինե Հարոյան
Օրը՝ սեպտեմբերի 26
Վայրը՝ Կոմիտասի թանգարան-ինստիտուտ
Հասցե՝ ք. Երևան, Արշակունյաց պող. 28
Մանրամասների համար զանգահարե՛ք՝ +374 11 570570

Գրականության և արվեստի թանգարանի նոր ցուցասրահում սեպտեմբերի 18-ից կգործի «Պատում մեկ իրի» ժամանակավոր ցուցադրությունների շարքը, որի շրջանակում պարբերաբար կցուցադրվեն թանգարանում պահվող բացառիկ ցուցանմուշներ։

 

Շարքի մեկնարկը կտրվի մեծն շանսոնյեի 100-ամյակին նվիրված «Ազնավուրի մանկության թատրոնը» ցուցադրությամբ, որի առանցքային մաս է կազմելու բացառիկ նմուշ հանդիսացող՝ Ազնավուրի առաջին բեմական զգեստը։

 

Ազնավուրի մայրը՝ Քնարը, դերասանուհի էր, իսկ հայրը՝ Միքայելը (Միշան)՝ երգիչ։ Շառլը թատրոնի և երաժշտության աշխարհին ծանոթ էր դեռ մանկուց: 1933 թվականին ծնողները որոշում են իրենց 9-ամյա որդուն տանել Ռոնյոնի արվեստի դպրոց, քանի որ փոքրիկ Շառլը երազում էր դերասան դառնալ։ Ուսումնառության առաջին իսկ տարում տաղանդավոր տղան անգամ բեմ է բարձրանում։ Շառլն իր համար բեմական անուն է ընտրում Ազնավուրը և սկզբնական շրջանում Պտի-Մոնդ անունը կրող փոքրիկ էստրադային բեմում հանդես է գալիս որպես պարող, ապա սկսում է մանկական դերեր կատարել Օդեոն, Մադլեն, Մարինի փարիզյան թատրոններում։

 

«Ազնավուրի մանկության թատրոնը» ժամանակավոր ցուցադրությանը ներկայացվելու են նաև երբևէ չցուցադրված ցուցանմուշներ՝ Ազնավուրի մանկության լուսանկարներ, ներկայացումների ազդագրեր։

 

ք. Երևան, Արամի 1
This email address is being protected from spambots. You need JavaScript enabled to view it.
(+374 98) 81-26-00

ՀՀ կրթության, գիտության, մշակույթի և սպորտի նախարարությունը, հիմք ընդունելով պետական քաղաքականության առաջնահերթությունները և ոլորտային ռազմավարական գերակայությունները, 2024- 2025 թթ. ուսումնական տարին հայտարարել է «Մշակութային կրթության տարի»: Նախաձեռնությունը նպատակ ունի ընդլայնելու մշակույթի դերը կրթական գործընթացներում՝ նպաստելով դպրոցականների՝ հանրակրթության պետական չափորոշչով սահմանված առանցքային կարողունակությունների ձևավորմանը, ազգային արժեհամակարգի և լայն աշխարհայացքի կայացմանը:

«Մշակութային կրթության տարվա» մեկնարկի շրջանակում 2024 թ. սեպտեմբերի 14-ին՝ ժամը 12:00-16:00-ն, նախարարությունը ՀՀ բոլոր մարզերում կազմակերպում է «Դպրոցական բաժանորդային համակարգ» ծրագրի Էքսպո-արշավ, որի հիմնական նպատակն է ստեղծել իրազեկման հարթակ ծրագրին միացած մշակութային կազմակերպությունների և դպրոցների համար՝ ներկայացնելով մարզի մշակութային ներուժը շահառու ուսումնական հաստատություններին:

Միջոցառման շրջանակում յուրաքանչյուր մարզում նախատեսվում է մեկ հարթակում միավորել տվյալ մարզից «Դպրոցական բաժանորդային համակարգ» ծրագրին միացած մշակութային կազմակերպությունները, որոնք շահառուներին կներկայացնեն իրենց ծրագրերը մեկ տարվա կտրվածքով:

Նախարարությունը հրավիրում և հորդորում է բոլոր դպրոցականներին ու ուսուցիչներին ակտիվ մասնակիցը լինելու կրթամշակութային տոնին:

Եղիշե Չարենցի անվան Գրականության և արվեստի թանգարանի տնօրինությունը հայտարարում է, որ թանգարանի ֆոնդերի համալրման նպատակով պատրաստ է ձեռք բերել 19-20 դարերի հայ գրականությանը, թատերարվեստին, կինոարվեստին և երաժշտությանն առնչվող վավերագրեր, անհատական արխիվներ, մշակութային գործիչների անձնական իրեր, մշակութային կազմակերպությունների արխիվներ, 19-20 դարերի լուսանկարներ, գեղարվեստի գործեր։

Ներկայացված բոլոր նմուշները կգնահատվեն թանգարանի գնահատու-ֆոնդային հանձնաժողովի կողմից՝ ըստ ընդունված չափորոշիչների։

 

Գրականության և արվեստի թանգարանի հավաքածուի համալրման հայեցակարգը ձևավորվել է 103-ամյա թանգարանի փորձի և ավանդույթի հիման վրա: Թանգարանը նախ ընդգրկել է 18-րդ դարի երկրորդ կեսից սկսած մինչև նորագույն ժամանակների հայ գրականության ու հայագիտության, ապա հայ թատրոնի, երաժշտության և կինոարվեստի երախտավորների անհատական արխիվները, հայ կրթական օջախներին, ստեղծագործական միություններին ու մամուլի խոշոր օրգաններին վերաբերող նյութեր, ինչպես նաև հնատիպ գրքեր ու հայագիտական հրատարակություններ:

Ըստ այդմ թանգարանը ձգտել և ձգտում է, համալրելով իր ֆոնդը, ամբողջացնել նշված ժամանակաշրջանի մշակութային այդ բնագավառների լիակատար պատմությունը: Մինչև այժմ ձեռք բերված շուրջ 1300 անհատական արխիվներն ու հավաքածուները ընդգրկում են մոտ մեկ միլիոն թանգարանային առարկա: Դրանց հանրահռչակումը կատարվում է երկու հիմնական ուղղությամբ.
1. Մշտական ցուցադրությունների և ժամանակավոր ցուցահանդեսների կազմակերպում (մայր թանգարանում և նրա մասնաճյուղերում), ինչպես նաև մասնակցություն հայաստանյան և արտասահմանյան այլևայլ ցուցադրությունների ու ցուցահանդեսների
2. Բնագրերի և դրանց վերաբերյալ ուսումնասիրությունների հրատարակություններª թե° անմիջապես Թանգարանի կողմից և թե° գիտական հանրությանը սպասարկելու միջոցով: Մինչև այժմ մեր դասական հեղինակների երկերի ակադեմիական հրատարակությունների մեծ մասը կատարվել է և շարունակում է կատարվել Թանգարանի հավաքածուի հիման վրա:
Ըստ այսմ Թանգարանի հավաքածուն համալրվում է հիմնականում հետևյալ նկատառումներով.
1. Ձեռք բերել Թանգարանի հավաքածուի մեջ տակավին տեղ չգտած այն խոշոր գործիչների ֆոնդերը և այն հավաքածուները, որոնց շնորհիվ հնարավոր է նշված ժամանակաշրջանի հայ գրական ու կրթական-մշակութային կյանքի համապատկերի առավել ամբողջացումը: Այս ուղղությամբ հատկապես ուշադրության կենտրոնում են սփյուռքահայ գաղթօջախների երևելի դեմքերն ու գրական-մշակութային երևույթները, ինչպես նաև հայագիտության հայ և օտարազգի երախտավորները:
2. Համալրել Թանգարանի հավաքածուի մեջ տեղ գտած հայ դասական հեղինակների անհատական ոչ ամբողջական ֆոնդերը, որոնց յուրաքանչյուր փաստաթուղթ կարող է լույս սփռել թե° տվյալ հեղինակի կյանքի ու գործի, թե° տվյալ շրջանի մշակույթի պատմության դեռևս չպարզաբանված էջերի վրա:
3. Համալրել անհատական ֆոնդերից դուրս գտնվող լուսանկարների, անձնական իրերի, թատերական զգեստների ու պարագաների, ազդագրերի, ծրագրերի և այլ իրերի ու վավերագրերի հավաքածուն, որ կողմնակիորեն հարստացնում է անհատական ֆոնդերը և հաճախ անգնահատելի դեր կատարում գիտահետազոտական և ցուցադրական աշխատանքների ժամանակ:
4. Համալրել հնատիպ գրքերի և հազվագյուտ հրատարակությունների հավաքածուն, որ անհրաժեշտ է նշված ժամանակաշրջանի գրական-մշակութային իրողություններն ուսումնասիրելու և հանրահռչակելու համար:
5. Ամբողջացնել Թանգարանի կերպարվեստի հավաքածունª նպատակ ունենալով նպաստել Թանգարանում ընդգրկված խոշոր գործիչների նյութերի առավել պատշաճ ցուցադրմանը, ինչպես նաև հայ բեմարվեստի ու գրքարվեստի պատմության համար կարևոր թանգարանային առարկաների պահպանմանն ու տարածմանը:
6. Համալրել Թանգարանի երաժշտական գործիքների հարուստ հավաքածուն, ձայնագրություններն ու տեսագրությունները, որոնք չափազանց կարևոր են հայ երաժշտության ու թատերարվեստի ուսումնասիրության և հանրահռչակման համար:
Գրականության և արվեստի թանգարանն իր հավաքածուի համալրման
այս հայեցակարգի հիման վրա ձեռք բերած հարուստ նյութերի բնույթով և իր գործառույթով չափազանց ինքնատիպ է ու կարևորª հայ ազգային մշակութային արժեքների պահպանման, հարստացման ու պրոպագանդման համար:

❗️❗️❗️ՈՒՇԱԴՐՈՒԹՅՈՒՆ

Ե.Չարենցի անվան գրականության և արվեստի թանգարանի նախամուտքի վերանորոգման աշխատանքներով պայմանավորված` ս.թ. մարտի 15-ից մինչև աշխատանքների կատարման ավարտը թանգարանի մշտական ցուցադրությունը, «Միջին արևելք» հավաքածուի ցուցադրությունը և ընթերցասրահը փակ կլինեն։

Սիրով տեղեկացնում ենք, որ ս․թ․ մարտի 5-ին, ժամը՝ 16։00-ին, Գրականության և արվեստի թանգարանում կբացվի «Կոմիտասի անվան քառյակ-100» խորագրով ժամանակավոր ցուցադրությունը, որով և կմերկնարկի լեգենդար քառյակի հոբելյանական միջոցառումների շարքը։ Կցուցադրվեն քառյակի երախտավոր երաժիշտների լուսանկարներ, համերգային ազդագրեր, ծրագրեր և այլ արխիվային նյութեր։

Ցուցադրության բացմանը կհաջորդի Կոմիտասի անվան քառյակի համերգը, որի ընթացքում կհնչեն հայ, ռուս և արևմտաեվրոպական կոմպոզիտորների ստեղծագործություններ։



Մուտքն ազատ է։

Գրականության և արվեստի թանգարանում կբացվի ժամանակավոր ցուցադրություն՝ նվիրված դերասան, ռեժիսոր, դրամատուրգ և թատերական գործիչ, ՀԽՍՀ ժողովրդական արտիստ Արմեն Գուլակյանի ծննդյան 125-ամյակին։
Ցուցադրության բացմանը կհաջորդի ՀՀ ԳԱԱ թղթակից անդամ,
արվեստագիտության դոկտոր, պրոֆեսոր Հենրիկ Հովհաննիսյանի և արվեստագիտության թեկնածու, դոցենտ Գոռ Վանյանի դասախոսությունը «Արմեն Գուլակյանի ստեղծագործական կյանքը և արվեստը» թեմայով։

Մուտքն ազատ է։

«Կումայրի» պատմամշակութային արգելոց-թանգարանի ցուցասրահում բացվելու է «Հավերժի վավերագրողները․ Արամ, Արա, Արտաշես Վրույրներ» խորագրով ժամանակավոր ցուցադրությունը, որը կազմակերպվել է Ե․ Չարենցի անվան գրականության և արվեստի թանգարանի և Հայաստանի պատմության թանգարանի հետ համատեղ։

Ե․ Չարենցի անվան գրականության և արվեստի թանգարանը, հիմնվելով ֆոնդային տպագիր և ձեռագիր նյութերի վրա, մշակել է ամանորյա կրթական-ժամանցային ծրագիր, որը կմեկնարկի ս․թ․ դեկտեմբերի 15-ից։

Ծրագրի ընթացքում մասնակիցները կզարդարեն Նոր տարվա ավանդական Կաղանդի ծառը, կդիտեն հատուկ տեսանյութ Սփյուռքի տարբեր համայնքներում ամանորյա տոնակատարության պահպանված կամ փոփոխված ավանդույթների մասին։ Դպրոցականները կլսեն նաև արևմտահայ գործիչ, գրող Դավիթ Ադամյանի «Գալանդոս» /Կաղանդ/ հեքիաթը, որը հայերենով հրատարակված չէ։ Ծրագրի ավարտին դպրոցականները կմասնակցեն «Ամանորի 7 խորհուրդները» վիճակահանությանը։

Կրթական ծրագրին կարող են մասնակցել 12-16 տարեկան դպրոցականները։ Ծրագրի տևողությունը 60 րոպե է։ Մանրամասների համար զանգահարել 010543463 հեռախոսահամարով։

Գրականության և արվեստի թանգարանը շարունակում է հայ կինոյի 100-ամյակին նվիրված «Կինոսրահ» միջոցառումների շարքը։ 

Նոյեմբերի 25-ին՝ ժամը 15:00-ին, կհյուրընկալենք կինոգետ, արվեստագիտության թեկնածու, դոցենտ Սիրանույշ Գալստյանին։ Սիրանույշ Գալստյանը հանդես կգա կինոռեժիսոր, ՀՍՍՀ ժողովրդական արտիստ Գրիգոր Մելիք-Ավագյանի մասին դասախոսությամբ։ Այնուհետ կցուցադրվի «Երևանյան երազողներ» վավերագրական ֆիլմը՝ նվիրված Երևանին։ Ցերեկույթին կցուցադրվեն Գրիգոր Մելիք-Ավագյանի արխիվային նյութերից։


Մուտքն ազատ է։
Հասցե՝ Արամի 1

ԼԵՌՆԱԿԱՆԻՆ ՅՈՒՇԱՏԵՏՐԸ. հրատարակվել է Սմբատ Բյուրատի անտիպ հուշագրությունը

Հեղինակի ժառանգների նախաձեռնությամբ հրատարակվել է հայ մեծանուն գրող, պատմավիպասան, Հայոց ցեղասպանության նահատակ Սմբատ Բյուրատի ԼԵՌՆԱԿԱՆԻՆ ՅՈՒՇԱՏԵՏՐԸ անտիպ հուշագրությունը։
Գրքի շնորհանդեսը տեղի կունենա նոյեմբերի 3-ին ժամը 14:00-ին` Ե. Չարենցի անվան գրականության և արվեստի թանգարանում (հասցե` Արամի 1):
Մասնակցությունն ամրագրելու համար խնդրում ենք զանգահարել (010) 543463 հեռախոսահամարով։
Տեղերը խիստ սահմանափակ են

Ե. Չարենցի անվան գրականության և արվեստի թանգարանում հոկտեմբերի 19-ին, ժամը 15:00-ին տեղի կունենա ցերեկույթ՝ նվիրված անվանի դերասան Ազատ Գասպարյանի ծննդյան 80-ամյակին: Նույն օրը կբացվի նաև ցուցադրություն՝ նրա կյանքին ու գործունեությանը վերաբերող:
Ելույթով հանդես կգան թանգարանի տնօրեն, բանասիրական գիտությունների թեկնածու Վահագն Սարգսյանը, կինոգետ, պրեֆեսոր Դավիթ Մուրդյանը, պրոֆեսոր Անետա Երզնկյանը, խմբագիր, կինոգետ Ռոբերտ Մաթոսյանը և անվանի այլ արվեստագետներ:
Երաժշտական կատարմամբ հանդես կգա արտիստի դուստրը՝ Նաիրի Գասպարյանը։
Վերջում ներկաները կունկնդրեն Ազատ Գասպարյանի՝ մեր օրերի համար էլ արդիական խոհերը <<Հայի հայրենիք>> տեսանյութում, նաև կավայելենք արտիստի ասմունքը:

 

Մուտքն ազատ է։