Այս տարի համաեվրոպական ակցիան մեկնարկեց մայիսի 17-ին, որի շրջանակներում Գրականության և արվեստի թանգարանը ներկայացավ նորաբաց մշտական ցուցադրությամբ «Մշակութային ճեմուղի»՝ խորագրով և «Հայ երգի ուսուցում կարաոկե խաղի միջոցով» ծրագրով: Թանգարանի կոմիտասյան դահլիճում մի քանի ժամ շարունակ այցելուները հնարավորություն ունեցան կատարել Կոմիտասի, Սայաթ-Նովայի, Առնո Բաբաջանյանի, Արտեմի Այվազյանի և այլ կոմպոզիտորների ստեղծագործություններ՝ երգուսույցի /կարաոկե/ միջոցով: Նրանց բաժանվեցին բուկլետներ՝ երգերի հեղինակների մասին տեղեկատվությամբ: Թանգարանի հիմնական միջոցառումներին զուգընթաց «Արտբրիջ» գրախանութի հետ համատեղ կազմակերպվել էր գրքերի ցուցահանդես-վաճառք` թանգարանի այցելուների համար հատուկ զեղչերով և անակնկալներով:
