«Թանգարանային գիշեր» ակցիան այս տարի անցկացվեց  մայիսի 16-ին:  Այն կրում էր  «Թանգարաններ. hիշողության վկաներ»  խորագիրը: Գրականության և արվեստի թանգարանը ակցիային ներկայացավ մի շարք ծրագրերով.

Ժամը 18:00-ից Թանգարանի ժամանավավոր ցուցասրհում այցելուները հնարավորություն ունեցան դիտելու Հայոց եղեռնի 100 ամյա տարելիցին նվիրված  «Հիշողության պատուհաններ»  խորագիրը կրող ցուցադրությունը, որով ներկայացվել էր մեր հայրենիքի արևմտյան հատվածի և հատկապես` Կ. Պոլսի  մշակութային  կյանքը  19- րդ դարից մինչև ցեղասպանությունը:

Թանգարանի կինոսրահում տեսաֆիլմի  միջոցով ցուցադրվեց  1894-1923թթ. գրված Հայոց  ցեղասպանությունը փաստող անպատասխան նամակներին հայ և օտարազգի անվանի գործիչների պատասխան-արձագանքները, որը իրականացվել  է «Պատասխան՝ 100 տարի անց» նախագծի  շրջանակներում:

Երևանի թատրոնի և կինոյի պետական ինստիտուտի ուսանողները   բեմականացված ընթերցեցին  Ռուբեն Սևակի և կնոջ՝ Յանի Սևակի սիրային նամակները ու բանաստեղծությունները, իսկ վերջում, թռուցիկների տեսքով, բաժանեցին այցելուներին:

Թանգարանի կոմիտասյան սրահում «Այրուձի» արշավախմբի «Այրոգի» ստվերների թատրոնի դերասանները  ներկայացրեցին   ստվերների թատրոնի  պատմությունը,  ցուցադրեցին  որոշակի հմտություններ, թե ինպես են պատրաստվում ստվերային ներկայացումները և բեմադրեցին Փավստոս Բուզանդի, Հովհաննես Թումանյանի  և ստվերախաղ  ցուցադրող ջավախքցի Խաչատուր Թումասյանի ստեղծագործությունների մոտինվերով մանրապատումներ:

Միջոցառումը շարունակեց «unFRAME»  խումբը: Երիտասարդ երաժիշտները թավջութակի, դափի,  թառի և փողային գործիքների միջոցով կատարեցին հայկական ազգային և հեղինակային  երգեր՝ ժամանանակից  մշակմամբ:

Միջոցառումներն այսքանով չավարտվեցին: Այցելուների ոգևորությունը այնքան այնքան մեծ էր, որ շուրջ  մեկ ժամ  ինքաբուխ կատարումներ հնչեցին երաժշտական ցուցասրահում: